ᐊᖕᒋᔪᖅᑳᓄᑦ

ᐊᓈᓇᐅᑉ ᑐᐱᖓ ᐃᓕᓐᓂᐊᕈᑕᐅᕗᖅ ᓱᕈᓯᓛᓄᑦ ᑕᕐᕆᔮᒃᓴᓄᑦ ᑕᓚᕖᓴᒃᑯᑦ ᑭᖑᓕᕇᑦᑕᖅᑐᖅ ᐸᕐᓇᐃᓇᓱᐊᖅᑐᖅ ᓴᖅᑭᔮᖅᑎᑦᑎᓪᓗᓂ ᑎᑎᖅᑭᕆᒋᐅᖅᓴᓂᕐᒥᒃ, ᓈᓴᐅᓯᕆᓂᕐᒥᒃ ᐊᔪᖏᓐᓂᕐᒥᒃ, ᐃᓅᖃᑎᖃᕈᓐᓇᕐᓂᕐᒥᒡᓗ ᓱᕈᓯᓛᑦ ᐃᓕᓐᓂᐊᕈᒫᕐᓂᖏᓐᓄᑦ ᐊᕐᕌᒍᒥ ᓯᕗᓪᓕᖅᐹᒥ.

ᑕᕝᕙᓂ ᒪᒃᐱᒐᕐᒥ ᓇᓂᓯᓂᐊᖅᑐᑎ ᐊᔪᕆᖅᓲᔾᔨᔾᔪᑎᓂᒃ ᐊᑐᕈᓐᓇᖅᑕᕐᓂᒃ ᐊᖏᔪᖅᑳᕆᔭᐅᓪᓗᑎᑦ, ᐸᖅᑭᒃᓯᔨᐅᓪᓗᑎᑦ, ᐃᓕᓴᐃᔨᐅᓪᓗᑎᓪᓘᓐᓃᑦ ᐃᑲᔪᖅᓱᕐᓂᐊᕋᕕᑦ ᓱᕈᓯᓛᓂᒃ ᐃᓕᑦᑎᕙᓪᓕᐊᓕᖅᑎᓪᓗᒋᑦ ᐅᖃᓕᒫᕆᐅᓕᖅᑎᓪᓗᒋᑦ, ᑎᑎᕋᕆᐅᖅᓴᓕᖅᑎᓪᓗᒋᑦ, ᓈᓴᐅᓯᕆᒐᓛᒍᓐᓇᖅᓯᑎᓪᓗᒋᑦ. ᓇᓂᓯᓂᐊᕆᕗᑎᑦ ᐱᓕᕆᐊᒃᓴᒃᑲᓐᓂᕐᓂᒃ ᖁᕕᐊᓇᖅᑐᓂᒃ, ᐱᔭᕐᓂᖅᑐᓂᒃ, ᖁᕕᐊᓇᑦᑎᐊᖅᑐᓂᒡᓗ ᖃᕋᓴᐅᔭᒃᑰᖅᑐᓂᒃ ᐅᖃᓕᒫᒐᕐᓂᒃ ᐱᔾᔪᑎᖃᖅᑐᓂᒃ ᑭᓇᒃᑯᙳᐊᓂᒃ ᑭᖑᓕᕇᒃᑐᓂᒃ, ᐊᒃᑐᐊᔪᓂᒡᓗ ᐃᓕᓐᓂᐊᕈᑎᒃᑲᓐᓂᕐᓄᑦ ᐃᑭᐊᖅᑭᕕᒃᑯᑦ ᐊᑐᕋᔅᓴᐃᓪᓗ ᖃᕋᓴᐅᔭᕋᓛᒃᑯᑦ.

ᐊᓈᓇᐅᑉ ᑐᐱᖓ ᖃᕋᓴᐅᔭᒃᑰᖅᑐᖅ ᐅᖃᓕᒫᒐᐃᑦ ᑭᖑᓕᕇᑦ

ᓱᕈᓯᓛᑦ ᐃᓕᑉᐸᓪᓕᐊᓲᖑᒻᒥᒻᒪᑕ ᐅᓂᒃᑳᑎᒍᑦ--ᓈᓚᖕᓂᒃᑯᑦ, ᑕᑯᓐᓇᕐᓂᒃᑯᑦ, ᐅᓂᒃᑳᖅᑐᑎᒡᓘᓐᓃᑦ. ᖃᕋᓴᐅᔭᒃᑰᖅᑐᑦ ᐅᖃᓕᒫᒐᐃᑦ ᐊᑑᑎᖃᑦᑎᐊᖅᑐᐊᓘᖃᑕᐅᔪᑦ ᓱᕈᓯᕐᓄᑦ ᐅᖃᓕᒫᒐᕐᓄᑦ ᐅᓂᒃᑳᓄᓪᓗ.

ᐊᑖᓂ, ᓇᓂᓯᓂᐊᖅᐳᑎᑦ ᖃᕋᓴᐅᔭᒃᑰᖅᑐᓂᒃ ᐅᖃᓕᒫᒐᕐᓂᒃ ᐃᓄᖖᒍᐊᖃᖅᑐᓂᒃ ᐱᔾᔪᑎᓕᖕᓂᒃ ᐊᓈᓇᐅᑉ ᑐᐱᖓᓃᖖᒑᖅᑐᓂᒃ. ᑖᒃᑯᐊ ᖃᕋᓴᐅᔭᒃᑰᖅᑐᑦ ᐅᖃᓕᒫᒐᐃᑦ ᑐᖅᑯᕈᓐᓇᖅᑕᑎᑦ ᐃᑭᐊᖅᑭᕕᖕᒥ ᖃᕋᓴᐅᔭᕋᓛᓄᑦ ᐊᔾᔨᒌᖏᑦᑐᓄᑦ ᑎᒍᒥᐊᒐᕐᓄᑦ, ᐊᓯᖏᓐᓄᓪᓗ ᑕᑯᔾᔪᑕᐅᔪᓐᓇᖅᑐᓄᑦ ᖃᕋᓴᐅᔭᒃᑰᖅᑐᓂᒃ ᐅᖃᓕᒫᒐᕐᓂᒃ.

ᑎᑎᖅᑭᕆᒋᐅᖅᐸᓪᓕᐊᓂᖅ ᐊᖏᕐᕋᒥ

ᐊᖏᕐᕋᐃᑦ ᑎᑎᖅᑭᕆᔾᔪᑎᖃᐅᖅᑎᓐᓇᓱᒡᓗᒍ ᖁᕕᐊᓇᕐᓗᓂᓗ ᐱᔭᕐᓂᖅᑑᔪᓐᓇᖅᑐᖅ!

ᑎᑎᖅᑭᕆᔾᔪᑎᖃᐅᖅᑎᓪᓗᒍ ᐊᖏᕐᕋᐃᑦ.

  • ᐊᖏᕐᕋᕐᓂ ᐅᖃᓕᒫᒐᒃᑯᕕᑦᑎᐊᕙᖃᕐᓗᑎᑦ ᕿᑐᕐᖓᐃᑦ ᖃᐅᔨᓂᐊᕐᒪᑦ ᐅᖃᓕᒫᒐᑦ ᐱᓐᓇᕆᔭᒃᓴᐅᓂᖏᓐᓂᒃ ᐃᒃᐱᒋᑦᑎᐊᕆᐊᖃᕐᓂᖏᓐᓂᒡᓗ.

  • ᐅᖃᓕᒫᕐᓇᖅᑐᖃᖅᐸᓪᓗᓂ ᐅᓪᓘᑉ ᐃᓗᐊᓂ ᖃᐅᑕᒫᑦ. ᐅᖃᓕᒫᖃᑎᒋᕙᒃᑯᕕᐅᒃ ᕿᑐᕐᖓᐃᑦ ᑕᕝᕙᓂᑦᓴᐃᓐᓇᖅ ᐅᓪᓗᕐᒥ ᖃᐅᔨᓂᐊᖅᑐᖅ ᐅᖃᓕᒫᕐᓂᖅ ᐱᒻᒪᕆᐅᓂᖓᓂᒃ. 
  • ᓂᐱᑭᑦᑐᒥᒃ ᐊᑲᕐᕆᓇᖅᑐᒥᒃ ᐅᖃᓕᒫᕐᕕᒃᑖᕐᓗᑎᑦ. ᐅᓚᕕᑦᑎᔪᓐᓇᖅᑐᑦ ᖃᒥᓪᓗᒋᑦ ᓱᕐᓗ ᑕᓚᕖᓴ, ᓈᓚᐅᑦ, ᐊᓯᖏᓪᓗ ᐊᑐᖅᑕᐅᓲᑦ, ᖃᕋᓴᐅᔭᒃᑰᖅᑐᒥᒃ ᐅᖃᓕᒫᖃᑎᒋᒍᕕᐅᒃ ᓴᖅᑭᑲᐃᓐᓇᖃᑦᑕᖅᑐᑦ ᖃᒥᒻᒥᓗᒋᑦ.
  • ᕿᑐᕐᖓᐃᑦ ᑕᑯᑎᑉᐸᓪᓗᒍ ᐅᖃᓕᒫᖅᑎᓪᓗᑎᑦ ᑎᑎᕋᖅᑎᓪᓗᑎᓪᓗ. ᓱᕈᓰᑦ ᖃᐅᔨᔪᒪᐃᓐᓇᓲᖑᒻᒪᑕ ᐃᓐᓇᐃᑦ ᖃᓄᐃᓕᐅᕐᒪᖔᑕ. ᕿᑐᕐᖓᐃᑦ ᑕᑯᖃᑦᑕᖅᐸᑦ ᐅᖃᓕᒫᖅᑎᓪᓗᑎᑦ ᑎᑎᕋᖅᑎᓪᓗᑎᓪᓗ, ᖃᐅᔨᔪᒪᓕᕐᓂᐊᕐᒥᔪᖅ ᐅᖃᓕᒫᕐᓂᕐᒥᒃ ᑎᑎᕋᕐᓂᕐᒥᓪᓗ!
  • ᐱᓕᕆᑎᓪᓗᑎᑦ ᐃᒡᓗᒥ ᕿᑐᕐᖓᐃᑦ ᐅᖃᓪᓚᕕᒋᖃᑦᑕᕈᒃ, ᐱᓱᖃᑎᒋᓗᒍᓗ ᓄᓇᔅᓯᓐᓂ, ᓂᕆᓐᓇᒥᓗ. ᐅᖃᓪᓚᖃᑎᒋᖃᑦᑕᕈᕕᐅᒃ ᑭᓱᑐᐃᓐᓇᐃᑦ ᒥᒃᓵᓄᑦ ᐅᖃᐅᓯᖅᑕᖏᑦ ᐃᓕᑉᐸᒋᑦ ᐅᖃᐅᓯᖅᑖᖅᐸᓪᓕᐊᓂᐊᖅᑐᖅ ᐅᖃᓪᓚᖃᑎᖃᕈᓐᓇᖅᓯᕙᓪᓕᐊᓗᓂᓗ ᖁᓱᖏᓪᓗᓂ.
  • ᐅᓂᒃᑳᕐᕕᒋᖃᑦᑕᕈᒃ ᐅᓂᒃᑳᖁᕙᓪᓗᒍᓗ ᕿᑐᕐᖓᐃᑦ.

ᐅᖃᓕᒫᕐᓂᖅ ᖁᕕᐊᓇᖅᑎᑉᐸᓪᓗᒍ!

  • ᕿᑐᕐᖓᐃᑦ ᐅᖃᓕᒫᕐᕕᒋᔭᕌᖓᕕᐅᒃ ᑕᑯᒃᓴᐅᑎᑉᐸᓪᓗᒋᑦ ᖃᓄᐃᖖᒍᐊᕐᓂᖏᑦ, ᓂᐲᓪᓗ ᐊᓯᔾᔨᖅᑕᖅᑎᑉᐸᓪᓗᒍ ᐃᓄᙳᐊᖏᑕ ᐊᔾᔨᒌᖏᓐᓂᖏᑦ ᒪᓕᒡᓗᒋᑦ.
  • ᕿᑐᕐᖓᐃᑦ ᐅᖃᓪᓚᕕᒋᕙᓪᓗᒍ ᐊᔾᔨᖖᒍᐊᖏᑕ ᒥᒃᓵᓄᑦ ᐅᖃᐅᓯᖅᑕᖏᑕᓘᓐᓃᑦ.
  • ᕿᑐᕐᖓᐃᑦ ᐊᐱᕆᖃᑦᑕᕈᒃ ᓱᖖᒍᐊᖅᑐᖃᕐᓂᐊᓕᖅᑐᒋᒻᒪᖔᒍ ᑕᑯᔭᖏᑕ ᒥᒃᓵᓄᑦ ᑐᓴᖅᑕᖏᑕᓗ ᐅᓂᒃᑳᕐᒥ.
  • ᐅᖃᓕᒫᒐᕐᒧᑦ ᐊᑐᖅᓯᒪᔭᖏᑦ ᐊᒃᑐᐊᓕᖅᑎᑉᐸᓪᓗᒋᑦ ᕿᑐᕐᖓᖅᐱᑦ ᓇᖕᒥᓂᖅ ᐊᑐᖅᓯᒪᔭᖏᓐᓄᑦ. ᓲᕐᓗ, ᐅᖃᓕᒫᒐᕐᒥ ᐆᒪᔪᖖᒍᐊᖃᖅᐸᑦ, ᐊᐱᕆᓗᒍ ᐊᑐᖅᓯᒪᔭᖏᓐᓂᒃ ᐆᒪᔫᑉ ᑕᐃᒪᐃᑦᑑᑉ ᒥᒃᓵᓄᑦ.
  • ᐅᖃᓕᒫᓕᖅᑭᑉᐸᓪᓗᒋᑦ ᐅᖃᓕᒫᒐᐃᑦ ᕿᑐᕐᖓᕐᓄᑦ ᐊᒥᓱᐊᖅᑎᕐᓗᒋᑦ. ᑕᐃᒫᒃ ᐅᖃᐅᓯᖅᑕᖅᑖᖅᐸᓪᓕᐊᓂᐊᖅᑐᖅ ᖃᐅᔨᒪᑦᑎᐊᓕᕐᓗᓂᓗ ᐅᖃᓕᒫᕆᐊᒃᓴᖅ.
  • ᖃᐅᔨᒪᑦᑎᐊᓕᖅᐸᒍ ᐅᖃᓕᒫᒐᖅ, ᑲᔪᖏᖅᓴᖅᐸᒡᓗᒍ ᐅᖃᓕᒫᖁᓗᒍ ᓂᐱᖃᕐᓗᓂ, ᐊᔾᔨᙳᐊᖏᓐᓂᒃ ᐅᖃᐅᓯᖃᕐᓗᓂ.
  • ᕿᑐᕐᖓᐃᑦ ᓂᕈᐊᖅᓯᑎᑉᐸᓪᓗᒍ ᐅᖃᓕᒫᒐᕐᓂᒃ ᐅᖃᓕᒫᕐᓂᐊᖅᑕᖏᓐᓂᒃ. ᑲᔪᖏᖅᓴᖅᐸᓪᓗᒍ ᓂᕈᐊᖅᓯᔪᓐᓇᖅᓯᕙᓪᓕᐊᓂᐊᕐᒪᑦ ᖃᓄᐃᑦᑐᓂᒃ ᐅᖃᓕᒫᒐᕐᓂᒃ ᐅᖃᓕᒫᕐᕕᐅᔪᒪᓗᑎᒃ.
  • ᐊᒡᒐᒧᑦ ᐊᐅᓚᑕᒐᓕᐅᖅᐸᒡᓗᑎᑦ ᐱᓪᓚᑦᑖᙳᐊᕈᑎᒃᓴᓂᒃ ᐅᖃᓕᒫᒐᕐᓂᒃ ᖃᐅᔨᒪᔭᖏᓐᓂᒃ ᐅᓂᒃᑳᑦ ᒪᓕᒡᓗᒋᑦ.

ᑎᑎᖅᓯᒪᔪᓂᒃ ᐅᔾᔨᕈᓱᓕᖅᑎᒋᐊᕐᓗᒍ.

  • ᑭᓱᑐᐃᓐᓇᑦᑎᐊᓂᒃ ᑎᑎᕋᖅᓯᒪᔪᓂᒃ ᐅᔾᔨᕈᓱᓕᖅᑎᓐᓇᓱᒃᐸᓪᓗᒍ ᕿᑐᕐᖓᐃᑦ ᐊᖏᕐᕋᕐᓂ. ᐅᓪᓛᖅᓯᐅᑎᐅᒐᓗᐊᖅᐸᑕ ᐃᒻᒧᒃᑯᕕᖕᓂᒡᓘᓐᓃᑦ ᑎᑎᖅᑲᖃᖅᑐᓂᒃ.
  • ᓇᓗᓇᐃᒃᑯᑕᓕᖅᓱᐃᓗᑎᑦ ᐃᒡᓗᒥᐅᑕᕐᓂᒃ, ᑎᑎᕋᕐᓗᑎᑦ ᓲᕐᓗ ᐊᒃᑕᕐᓗᑰᓯᕝᕕᒃ, ᐹ, ᐊᒻᒪ ᐃᒃᓯᕙᐅᑕᖅ. ᑎᑎᕋᖅᑕᕐᓂᒃ ᑎᒃᑯᐊᖅᓯᕙᒡᓗᑎᑦ ᖃᓄᐃᓕᖓᖕᒪᖔᑕ ᐅᖃᓕᒫᖅᐸᒡᓗᒋᑦ ᕿᑐᕐᖓᕐᓄᑦ.
  • ᓄᓇᓕᔅᓯᓐᓂ ᐱᓱᑲᑕᒡᓗᓯᒃ ᕿᑐᕐᖓᐃᓪᓗ, ᑎᒃᑯᐊᖃᑦᑕᒃᑭᑦ ᐊᔾᔨᒌᖏᑦᑐᑦ ᑎᑎᕋᖅᓯᒪᔪᑦ, ᓲᕐᓗ ᐊᖅᑯᑏᑦ ᑎᑎᖅᑲᖏᑦ, ᓄᓇᒃᑰᕈᑎᐅᑉ ᐊᖁᑐᓐᓇᐅᑎᖏᑦ, ᐃᒡᓗᐃᑦ ᑎᑎᖅᑲᖏᓪᓘᓐᓃᑦ.
  • ᐅᖃᓕᒫᕐᕕᒋᓕᕌᖓᕕᐅᒃ ᑎᒃᑯᐊᖅᓯᕙᒡᓗᑎᑦ ᐅᖃᐅᓯᖅᑕᓂᒃ. ᑖᓐᓇ ᕿᑐᕐᖓᕐᓂᒃ ᑕᑯᑎᑦᑎᓂᐊᖅᑐᖅ ᐅᖃᖅᑕᐅᔪᑦ ᑎᑎᕋᖅᓯᒪᔪᓪᓗ ᐊᒃᑐᐊᖃᑎᒌᖕᓂᖏᓐᓂᒃ.

ᓄᓇᓕᔅᓯ ᐊᑐᕐᓗᒍ.

  • ᐅᖃᓕᒫᒐᖃᕐᕕᒃᑕᖃᖅᐸᑦ ᓄᓇᓕᔅᓯᓐᓂ, ᐅᖃᓕᒫᒐᖃᕐᕕᖕᒨᖃᑎᒋᕙᓪᓗᒍ ᕿᑐᕐᖓᐃᑦ ᓂᕈᐊᖅᑎᑉᐸᓪᓗᒍᓗ ᖃᓄᐃᑦᑐᓂᒃ ᐅᖃᓕᒫᕐᕕᐅᔪᒪᒻᒪᖔᑕ ᐱᐅᒋᔭᖏᓐᓂᒃ.
  • ᓄᓇᔅᓯᓐᓂ ᓱᔪᖃᕈᓘᔭᖅᑎᓪᓗᒍ ᐊᐃᖃᑎᒋᖃᑦᑕᕐᓗᒍ ᐃᑲᔪᖅᓱᖅᑐᓄᑦ ᑎᑎᖅᑭᕆᓂᕐᒥᒃ ᓲᕐᓗ ᐅᓂᒃᑳᖅᑐᐊᖅᑐᖃᕐᓂᐊᖅᐸᑦ, ᐃᓕᖅᑯᓯᕐᓂᒃ ᓴᖅᑭᔮᖅᑎᑦᑎᔪᓄᑦ ᓲᕐᓗ ᓂᔾᔭᐅᓯᔭᖅᑐᓄᑦ ᕿᓚᐅᔾᔭᖅᑐᓄᓪᓘᓐᓃᑦ, ᐃᓄᐃᑦ ᐱᖖᒍᐊᕈᓯᖏᓐᓂᒃ ᐱᖖᒍᐊᖅᑐᓄᓪᓘᓐᓃᑦ.
  • ᑲᔪᖏᖅᓴᖅᐸᒡᓗᒋᑦ ᐃᓚᑎᑦ ᐱᖃᓐᓇᕆᔭᑎᓪᓗ ᕿᑐᕐᖓᕐᓄᑦ ᐅᓂᒃᑳᖃᑦᑕᖁᓗᒋᑦ.

ᐊᖏᕐᕋᒥ ᓈᓴᐅᓯᕆᔪᓐᓇᖅᓯᕙᓪᓕᐊᓂᖅ

ᓈᓴᐅᓯᕆᓂᖅ ᓈᓴᐅᑎᓕᕆᓂᑐᐃᓐᓇᖏᒻᒪᑦ. ᐃᓚᖃᓲᖑᒻᒪᑦ ᐆᑦᑐᕐᓂᕐᒥᒃ, ᑭᖑᓕᕇᓂᒃ, ᐃᓗᑦᑎᓕᖕᓂᒃ ᐊᖏᓕᕇᓂᒡᓗ. ᐊᔾᔨᒌᖏᑦᑐᓂᒃ ᓈᓴᐅᓯᕆᔾᔪᑎᓂᒃ ᐊᖏᕐᕋᒥ ᐱᓕᕆᔪᓐᓇᕆᕗᓯ ᐱᓕᕆᐊᖑᔪᓐᓇᖅᑐᓂᒃ ᓱᕈᓯᓛᓄᑦ ᖃᐅᑕᒫᖅᓯᐅᑎᓂᒃ ᐱᓕᕆᑎᓪᓗᒋᑦ ᐱᖖᒍᐊᕐᓂᒃᑯᓪᓗ. ᐅᑯᐊ ᐃᓱᒪᒋᒋᐊᕐᓂᐊᖅᐸᑎᑦ:

  • ᓈᓴᐃᖃᑎᒋᖃᑦᑕᕐᓗᒋᑦ ᓂᕿᓂᒃ (ᓲᕐᓗ ᓯᕙᓛᓂᒃ) ᐱᖖᒍᐊᓂᒡᓘᓐᓃᑦ (ᑭᑉᐹᕆᑦᑐᓂᒃ ᐃᓗᑦᑎᓕᖕᓂ) ᓂᕆᑎᓪᓗᒍ ᕿᑐᕐᖓᐃᑦ ᐱᖖᒍᐊᖅᑎᓪᓗᒍᓘᓐᓃᑦ.
  • ᓴᖅᑭᔮᖅᑎᑉᐸᓪᓗᒋᑦ ᐃᓚᓯᖃᑦᑕᕐᓃᑦ ᐃᓚᖖᒐᖅᓯᖃᑦᑕᕐᓃᓪᓗ ᓈᓴᐃᕙᓪᓗᑎᑦ ᓯᕗᒧᑦ ᐅᑎᒧᓪᓗ ᐃᓚᓯᔭᕌᖓᕕᑦ ᐃᓚᖖᒐᖅᓯᔭᕌᖓᕕᓪᓘᓐᓃᑦ ᐱᖖᒍᐊᓂᒃ.
  • ᑎᒃᑯᐊᖅᓯᕙᓪᓗᑎᑦ ᓈᓴᐅᑎᓂᒃ ᓴᖅᑭᔮᖅᑐᓂᒃ ᐃᒡᓗᒥ ᐅᖃᓕᒫᒐᕐᓃᑦᑐᓂᒃ, ᐅᓪᓗᖅᓯᐅᑎᓃᑦᑐᓂᒃ, ᐅᖄᓚᐅᑎᒦᑦᑐᓂᒡᓗ ᐊᓯᖏᓪᓗ.
  • ᕿᑐᕐᖓᐃᑦ ᐃᑲᔪᖅᑎᑉᐸᓪᓗᒍ ᓂᖅᑎᐅᖅᑎᓪᓗᑎᑦ ᐆᑦᑐᖅᑎᓪᓗᑎᑦ ᓂᖅᑎᐊᕕᑦ ᐃᓚᔅᓴᖏᓐᓂᒃ.
  • ᐃᓗᑦᑎᐅᒐᔪᒃᑐᓂᒃ ᐅᖃᓪᓚᐅᑎᖃᖅᐸᓪᓗᑎᑦ ᑖᒃᑯᐊᓗ ᐃᓗᑦᑎᓖᑦ ᑕᑯᔭᐅᒐᔪᒃᑐᑦ ᑕᑯᑎᑉᐸᓪᓗᒋᑦ ᐃᒡᓗᔅᓯᓐᓂ.
  • ᐱᖖᒍᐊᓂᒃ ᐊᑐᖅᐸᓪᓗᑎᑦ ᓲᕐᓗ ᐃᓗᑦᑏᑦ ᕿᔪᐃᑦ ᓴᐸᖓᐃᓪᓘᓐᓃᑦ ᐊᔪᕆᖅᓲᔾᔨᓂᐊᕋᕕᑦ ᑭᖑᓕᕇᓲᓂᒃ.
  • ᓈᓴᐅᓯᕆᓂᐅᑉ ᐅᖃᓪᓚᐅᓯᖏᓐᓂᒃ ᐊᑐᖅᐸᓪᓗᓯ ᓲᕐᓗ ᐊᖏᔪᖅ/ᒥᑭᑦᑐᖅ, ᖃᓂᑦᑐᖅ/ᐅᖓᓯᑦᑐᖅ, ᓯᓕᒃᑐᖅ/ᐊᒥᑦᑐᖅ, ᑕᑭᔪᖅ/ᓇᐃᑦᑐᖅ ᐊᔾᔨᒌᖏᑦᑐᓂᒃ ᓴᖅᑭᔮᖅᑐᓄᑦ ᐃᒡᓗᒥ.
  • ᕿᑐᕐᖓᐃᑦ ᐃᓕᐅᖅᑲᐃᑎᖃᑦᑕᕈᒃ, ᓲᕐᓗ ᐱᖖᒍᐊᓂᒃ ᐃᓕᐅᖅᑲᐃᑎᓪᓗᒍ ᐅᑎᖅᑎᐅᖅᑲᐃᓕᖅᐸᑦ, ᐃᓕᐅᖅᑲᐃᓗᑎᒃ ᓂᕿᓂᒃ, ᐱᕈᖅᑐᕕᓂᕐᓂᒃ ᓰᕐᓇᖅᑐᓂᒃ ᓰᕐᓇᖏᑦᑐᓂᒡᓗ.
  • ᐱᓕᕆᖃᑎᒋᖃᑦᑕᕐᓗᒍ ᕿᑐᕐᖓᐃᑦ ᖃᐅᔨᓇᓱᐊᖅᑎᓪᓗᒋᑦ ᖃᐅᔨᔭᕐᓂᖏᑦᑐᓂᒃ. ᓲᕐᓗ, ᕿᑐᕐᖓᐃᓪᓗ ᓂᕆᕐᒥᓗᖃᑎᒌᒃᑯᔅᓯᒃ ᐊᑕᐅᓯᕐᒥᒃ ᐸᓚᐅᒑᕐᒥᒃ ᐊᒥᐊᒃᑯᖃᕐᓂᖅᐸᑕ, ᐊᐱᕆᓗᒍ ᖃᓄᑦ ᑕᐃᒫᓪᓗᐊᖅ ᓂᕆᔪᓐᓇᑐᐃᓐᓇᐅᒻᒪᖔᓯᒃ. ᑖᓐᓇ ᓈᓴᐅᓯᕐᓂᕐᒥᒃ ᖃᐅᔨᑎᑦᑎᕙᓪᓕᐊᓂᐊᖅᑐᖅ ᐊᕕᒃᑐᐃᓂᕐᒥᒃ, ᐊᒻᒪ ᐃᑲᔪᖅᓱᕐᓗᓂ ᓇᓪᓕᒃᑭᑕᕐᓂᕐᒥᒃ.

ᐃᑭᐊᖅᑭᕕᒃᑯᑦ ᐅᖃᓕᒫᒐᑦ

ᐃᓕᓐᓂᐊᕆᐅᖅᓴᔪᑦ ᓄᑕᖅᑲᑦ ᑎᑎᖅᑭᕆᒋᐅᖅᓴᔪᓐᓇᖅᐳᑦ ᐅᓂᒃᑳᑎᒍᑦ − ᐅᓂᒃᑳᕐᕕᐅᓂᒃᑯᓪᓘᓐᓃᑦ, ᑕᕐᕆᔭᕐᓂᒃᑯᓪᓘᓐᓃᑦ, ᓇᒡᒥᓂᖅ ᐅᓂᒃᑳᕐᓗᑎᒡᓗ. ᐃᑭᐊᖅᑭᕕᒃᑯᑦ ᐅᖃᓕᒫᒐᑦ ᐃᑲᔫᑎᔪᐊᓘᕗᑦ ᓄᑕᖅᑲᓂᒃ ᐅᖃᓕᒫᒐᓕᕆᓂᕐᒧᑦ ᐅᓂᒃᑳᓂᒡᓗ.

ᑖᔅᓱᒪ ᐊᑖᓂ, ᑕᑯᓂᐊᖅᐳᑎᑦ ᐃᑭᐊᖅᑭᕕᒃᑯᑦ ᐅᖃᓕᒫᒐᓂᒃ ᓴᖅᑭᑎᑕᐅᖃᑦᑕᖅᑐᓂᒃ ᑭᓇᙳᐊᖑᓪᓗᑎᒃ ᐊᓈᓇᐅᑉ ᑐᐱᖓᓂ. ᒥᓇᕈᓐᓇᖅᑕᑎᑦ ᑖᒃᑯᐊ ᐃᑭᐊᖅᑭᕕᖕᒥᑦ ᖃᕆᓴᐅᔭᕋᓛᕐᓄᑦ ᐃᓚᓕᐅᑎᔪᓐᓇᖅᑐᒋᑦ, ᑎᒍᒥᐊᒐᕐᓄᓪᓗ, ᐅᕝᕙᓘᓐᓃᑦ ᐊᓯᖏᓐᓄᑦ ᐃᑭᐊᖅᑭᕕᒃᑯᑦ ᐅᖃᓕᒫᒐᕐᓂᒃ ᓴᖅᑭᑎᑦᑎᔪᓐᓇᖅᑐᓄᑦ.

ᓄᓇᕗᒥ ᒪᕐᕉᖕᓂᒃ ᐅᖃᐅᓯᓕᖕᓄᑦ ᐃᓕᓐᓂᐊᖅᑎᑦᑎᓂᕐᒥ ᑲᑐᔾᔨᖃᑎᒌᑦ (NBES) ᓄᓇᓕᖕᓂ ᓇᒻᒥᓂᕆᔭᐅᔪᖅ, ᑮᓇᐅᔾᔭᒃᓴᓇᓱᐊᖅᑎᐅᖏᑦᑐᑦ ᐃᓱᒫᓘᑎᖃᖅᑐᑦ ᑐᖅᑯᐃᓂᕐᒥᒃ, ᓴᐳᒻᒥᓂᕐᒥᒃ ᓴᖅᑭᔮᖅᑎᑦᑎᓂᕐᒥᓪᓗ ᐃᓄᐃᑦ ᐅᓂᒃᑳᖃᑦᑕᖅᓯᒪᔭᖏᓐᓂᒃ, ᐃᓕᖅᑯᓯᕐᒦᖖᒑᖅᑐᓂᒃ ᖃᐅᔨᒪᔭᐅᔪᓂᒃ, ᐅᖃᐅᓯᕐᒥᓪᓗ. ᐊᒥᓱᑲᓪᓚᐅᒻᒪᑕ ᐃᓄᒃᑎᑐᑦ ᐅᖃᐅᓯᓖᑦ ᓱᕈᓯᖅᓯᐅᑎᑦ ᐅᖃᓕᒫᒐᐃᑦ ᐊᑐᐃᓐᓇᐅᔪᑦ ᐊᑭᖃᖏᑦᑐᒥᒃ ᒥᓇᒐᔅᓴᐃᑦ:

ᐱᓕᕆᐊᒃᓴᑦ

ᐊᑐᕋᔅᓴᒃᑲᓐᓃᑦ

This IS Literacy-ᑯᑦ ᐱᓕᕆᐊᖑᕗᖅ ᑎᑎᖅᑭᕆᑎᑦᑎᓇᓱᐊᕐᓂᕐᒥᒃ ᐱᓕᕆᔪᑦ ᓱᕈᓰᑦ ᒪᒃᑯᒃᑐᓪᓗ ᑕᑯᓐᓇᕋᔅᓴᖏᓐᓂᒃ.

ᑖᒃᑯᐊ National Reading Campaign ᑮᓐᓇᐅᔾᔭᔅᓴᓇᓱᐊᖅᑎᐅᖏᑦᑐᑦ ᑕᑯᓐᓇᖖᒍᐊᖅᑐᑦ ᓴᖅᑮᔪᑦ, ᒪᑭᒪᔪᓐᓇᖅᑐᖅ, ᐃᓅᖃᑎᖃᕈᓐᓇᑦᑎᐊᓕᖅᑎᑦᑎᕙᓪᓕᐊᔪᖅ ᑭᒃᑯᓕᒫᓂᒃ ᐱᔪᓐᓇᖅᑎᑦᑎᔪᓂᒃ ᑕᒪᐃᓐᓂ ᐃᓅᓯᓕᒫᖅ ᐃᓕᑉᐸᓪᓕᐊᖏᓐᓇᕐᓂᕐᒥᒃ.

ᐃᓕᑕᖅᓯᓂᒃᑯᑦ ᓴᖅᑭᔮᖅᑎᑦᑎᔪᖅ ᐃᑲᔪᖅᓱᖅᑐᓂᓗ ᑎᑎᖅᑭᕆᑎᑦᑎᓂᕐᒥᒃ ᓄᓇᕘᑉ ᐅᖃᐅᓯᖏᓐᓂᒃ ᐊᑐᖅᑐᖅ ᐃᒃᐱᒋᓪᓗᒋᓪᓗ ᐅᒃᐱᕆᔭᐅᔪᓂᓪᓗ ᓄᓇᓕᖕᓂ ᐱᔪᓐᓇᖅᓯᑎᑦᑎᐊᕋᓱᐊᕐᓂᕐᒥᒃ ᐱᕙᓪᓕᐊᓂᕐᒥᒡᓗ.

It Starts at Home-ᑯᑦ ᓴᖅᑭᑕᐅᓯᒪᔪᖅ ᐃᓕᓐᓂᐊᕐᓂᓕᕆᔨᒃᑯᓐᓂᒃ ᓄᓇᕗᒻᒥ ᐱᓕᕆᖃᑎᖃᖅᑐᑎᒃ ᓄᓇᕗᒻᒥ ᐃᓕᓴᐃᔩᑦ ᑲᑐᔾᔨᖃᑎᒌᒃᑯᓐᓂᒃ.

Inhabit Media-ᑯᑦ ᐃᓄᖕᒧᑦ ᓇᒻᒥᓂᕆᔭᐅᔪᖅ ᓴᖅᑮᔩᑦ ᑐᕌᒐᓖᑦ ᑐᖅᑯᐃᓂᕐᒥᒃ ᓴᖅᑭᔮᖅᑎᑦᑎᓂᕐᒥᒡᓗ ᐅᓂᒃᑳᓂᒃ, ᖃᐅᔨᒪᔭᓂᕐᓂᒃ ᐱᔪᓐᓇᕐᓂᖏᓐᓂᒡᓗ ᐃᓄᐃᑦ ᐅᑭᐅᖅᑕᑐᖓᓂᒥᐅᓪᓗ ᑲᓇᑕᐅᑉ.

 

ᐊᓯᖏᑦ ᖃᕋᓴᐅᔭᒃᑯᑦ ᐊᑐᕋᔅᓴᐃ

  • ᐅᖃᐅᓰᑦ ᐱᖖᒍᐊᕈᑏᑦ ᐃᓄᐃᑦ ᐅᖃᐅᓯᖏᓐᓄᑦ ᐊᑐᕋᔅᓴᖅ ᐊᑐᖅᑐᖅ ᖁᕕᐊᓇᖅᑐᓂᒃ ᑎᑎᖅᑐᒐᖅᓯᒪᔪᓂᒃ ᓂᔾᔭᐅᓯᔭᖅᑕᐅᓂᑯᓂᒡᓗ ᐃᓕᓴᖅᓯᔪᓐᓇᖁᓪᓗᒋᑦ ᐃᓗᑦᑎᓕᖕᓂᒃ ᓂᐱᓂᒡᓗ, ᐅᖃᐅᓯᖅᑕᓂᒡᓗ ᐃᓕᑦᑎᕙᓪᓕᐊᑎᓪᓗᒋᑦ. ᒥᓇᕐᓗᒍ ᐱᖖᒍᐊᒐᖅ iTunes-ᑯᑦ ᐅᕝᕙᓗ Google Play Store-ᒃᑯᑦ!
  • ᑎᑎᕋᕆᐅᖅᓴᐅᑎ ᐃᓄᒃᑐᑦ ᐃᓕᓐᓂᐊᕈᑕᐅᕗᖅ ᖃᕆᓴᐅᔭᒃᑯᑦ ᐊᑐᕋᒃᓴᖅ ᓱᕈᓯᓛᓄᑦ ᖁᕕᐊᓇᖅᑐᖅ ᓂᐱᓂᒃ ᑎᑎᖅᑲᓂᓪᓗ ᐃᓕᓴᖅᓯᔪᓐᓇᖅᓯᔾᔪᑕᐅᓪᓗᓂ. ᒥᓇᕋᒃᓴᐅᒋᕗᖅ iTunes-ᑯᑦ ᐅᕝᕙᓗ Google Play Store-ᒃᑯᑦ!